Wala sang nahuman nga kasugtanan sa tunga nanday US President Donald Trump kag Russian President Vladimir Putin matapos nga ginpatigayon ang bilateral meetings.
Sa joint press statement sang duha ka presidente, ginpahayag nila nga nangin madinalag-on kag may significante nga development sa ila pag-estoryahanay, apang wala sang ginbuy-an nga maathag nga detalye.
Sa statement ni Putin paagi sa interpreter, “There’s no deal until there’s a deal,” nga kaangay nga nagakahulugan nga wala sang nahimo nga deal, wala sang ceasefire, kag wala sang mahatag nga significante nga report.
Pahayag sini nga parehas lamang ang roots sang Russia kag Ukraine kag ang gyera ang makabig trahedya sa duha ka pungsod gani luyag naman nila sang nagalawig nga kalinong.
Agud maangkon ang lasting settlement, suno kay Putin dapat nga masolusyunan ang mga nagapanguna nga rasun sang konflikto.
Nagalaom man ini nga kun ano ang progreso nga nahuman na sa paghinun-anon kay Trump ang indi na balabagan pa sang European nations.
Ginpasalamatan man sini si Trump kag ginalauman sini ang pagbalik sang maayo nga business relations.
Dugang pa sini nga kun si Trump ang Presidente sang 2022, mahimo wala sang natabo nga gyera.
Samtang nagalaom naman si Trump nga ini ang palaagyan na agud tayuyon nga matapos ang gyera.
Dako ang pagpati sini nga ang negosasyon ang magaresulta sa pag-untat sang pagkamatay sang linibo nga persona kada adlaw bangod sa gyera.
Antes magbiya sa podium, nagpahayag pa sa iya si Putin, nga sa Kremlin patigayunon ang masunod nga meeting.// Samtang ang duha ang wala naman nagsabat sa pamangkot sang media.
