Gin-anunsyar sang Department of Budget and Management (DBM) sang Huwebes, December 18 nga nagpagwa na ini sang Circular Letter No. 2025-13 para sa padayon nga paghatag sang Productivity Enhancement Incentive (PEI) para sa Fiscal Year 2025.
Suno sa DBM, ang tagsa ka qualified nga miyembro sang gobyerno ang makabaton sang P5,000, kasunod sa pagsulondan nga nakabutang sa Budget Circular No. 2017-4.
Sakop sang PEI ang mga sibilyan nga empleyado sang nagkalain-lain nga national government agencies, state universities and colleges, government-owned or controlled corporations nga yara sa idalom sang DBM, local government units, kag local water districts, amo man ang mga military kag uniformed personnel.
Suno sa DBM nga ang P9.24 billion nga pondo para sa PEI sang mga kwalipikado nga sibilyan kag uniformed personnel sang national government para sa 2025 ang ginpagguwa na sa idalom sang 2025 General Appropriations Act.
