Aminado ang business group sa Negros Occidental nga dako ang ginsarurot sang ekonomiya sang tuig 2020 kun ipaanggid sang tuig 2019 bangud sa coronavirus disease.
Sa interview sang Bombo Radyo kay Metro Bacolod Chamber of Commerce and Industry (MBCCI) president Frank Carbon, ginpahayag sini nga antes pa man ang 2020, pinaka-manggaranon kag grabe ang tiyog sang kwarta sa Western Visayas ilabi na sa Negros Occidental kag Bacolod City.
Isa sa mga rason sini amo ang pagsanyog sang agrikultura, konstruksyon kag remittances sang mga overseas Filipino workers (OFWs).
Apang pag-abot sang 2020 suno kay Carbon, nagsarurot gid ang ekonomiya bangud sa lockdown nga dala sang coronavirus pandemic.
Suno diri, una gid nga naigo ang mga OFWs nga pinakadako nga nagadala sang kwarta sa pungsod.
Ginsundan ini sang tranport kag hotel and restaurant sectors.
Suno kay Carbon, 60% sang nagadala sang kwarta sa pungsod ang nag-collapse.
Nagapasalamat naman ini sa agriculture sector nga nagsalbar sa rehiyon subong nga may yara sang pandemic.
Suno kay Carbon, dapat mangin leksyon na ini nga seryosohon kag buligan ang sektor sang agrikultura.
