Kanselado ang byahe sang tanan nga barko sa mga pantalan sa Negros Occidental matapos ginpaidalom sa Signal No 1 bangod sa Tropical Depression WILMA, luwas sa Pulupandan Port.
Sa interview sang Bombo Radyo Bacolod kay Lt Junior Grade John Hoffer Olis, spokesperson sang Coast Guard Station Northern Negros Occidental, matapos magpagwa sang weather forecast alas-4:00 sang kaagahon kun sa diin napaidalom sa Signal No 1 ang Bacolod City kag pila ka bahin sang Northern kag Eastern Negros Occidental, automatic man nga ginkanselar ang byahe.
Kanselado ang tanan nga sea trip sa Roll on Roll off (RoRo) man ukon sa fast craft vessels.
Wala naman nalakip ang Pulupandan Port sa nagkanselar sang byahe bangod ang banwa ang wala pa nalakip sa mga ginpaidalom sa Signal No. 1.
Sa karun, padayun pa nga gina-account ang numero sang nastranded sa mga pantalan.
Ginapahanumdom man sa mga mangingisda nga likawan ang pagpalawod bangod sa mabaskog nga pagbalod.
Ginapadulungan man nila ang mga natumod nga flood prone areas agud ipahanumdom sa mga pumuluyo ang pagpatigayon sang preemptive evacuation.
