Ginreklamo sang isa ka motorista ang nabaton sini nga resibo gikan sa City Treasurer’s Office nga gin-tamper ukon ginretoke sang cashier.
Suno kay Jose Antonio Robello, deputy officer-in-charge sang Bacolod Traffic Authority Office (BTAO), nadakpan ang motorista bangod nga wala ini sang helmet kag wala sang lisensya kag siya ang ginmultahan sang P2,300; P1,000 bangod nga wala sang helmet, P300 bangod nga wala ini sang lisensya kag P1,000 para sa towing.
Suno sa motorista, nagbayad ini sang P1,300 sa City Treasurers Office apang ang naggwa sa resibo nga na-print sang computer amo nga P300 lang, kag ini ang gin-tamperan lang sang cashier kag ginsulatan sang P1,300 nga numero.
Kasubong man nga naka-print ang tinaga nga “three hundred pesos only” apang ini man ang gin-tamperan sang cashier kag ginsulatan sang “one thousand three hundred pesos only”.
Nakita naman sa record sa computer nga P300 lang ang na-encode apang P1,300 ang ginbayaran sang motorista.
Suno kay Robello, gintsekyar sa cashier ang natabo kag gin-ako man sini nga siya ang nagsulat sang P1,300 gamit lamang ang ballpen.
Ini sa karun ang gina-imbestigaran sang City Treasurer’s Office kag gin-athag ni Robello nga indi imbulbado diri ang BTAO magluwas na lamang sa pag-apprehend sa motorista.
