Nagalaom ang presidente sang Taxi Operators of Negros Occidental (TONO) nga kun madayon gid man ang plano nga pagbutang sang child car seat sa mga public utility vehicles (PUVs), ang mga pasahero nga may dala nga bata mismo ang maga-provide sini bangud dugang lamang ini nga gasto para sa mga operators.
Madumduman nga ginpahayag sang damlag lang ni Atty. Roberto Valera, LTO deputy director for law enforcement, nga ila ginakonsiderar ang child car seat sa mga PUVs.
Sa interview sang Bombo Radyo Bacolod kay TONO President Mario Eusebio, ginpahayag sini nga dugang nga gasto naman pananglitan nga madayon ang pagbutang sang child car seat sa mga PUVs kaangay sang taxi.
Suno kay Eusebio, ang mga pasahero nga may bata nga naga-edad 11-anyos panubo kuntani ang magaprovide sini kun madayon gid man ang amo nga plano.
Dugang pa sini nga wala sang pulos kun magabakal sila sang child car seat bangud nga indi man bata ang kalabanan nila nga pasahero kag indi ini applicable sa mga taxi bangud indi tanan nga taxi ang nadesinyo nga sarang mabutangan sang car seat.
Suno kay Eusebio, dapat tun-an anay sang husto ang amo nga plano antes nila ikonsiderar kag ipatuman.
