Gin-athag ni Bacolod City Lone District Congressman Greg Gasataya nga wala siya nakasugo sang mga tawo nga maglibot agud ipaalinton sa mga pumuluyo ang impormasyon nga magaabot ini sa lugar nga manghatag ini sang ayuda.
Sa interview sang Bombo Radyo Bacolod kay Congressman Greg Gasataya, ginpahayag sini nga kon may ayuda sila nga igahatag, nagapakig-angot ini direkta sa mga barangay official agud mapatigayon ang pagpanagtag.
Nagpanawagan man ini sa mga tawo nga may kahimuan sa likod sang pagpatalang sang linibo ka mga tawo nga nagikan sa Barangay Felisa kag Mansilingan.
Aminado man ini nga nakibot siya sang nakita ang madamo nga litrato nga may yara sang mga bangko nga nabutang sa atubang sang mga balay kag iban diri ang yara sa higad sang highway bangud ang iban diri ang gintabok pa ang suba agud dal-on ang bangko kag quarantine pass.
Suno kay Gasataya, wala sa iya ang pagpangguba ukon pamulitika nga ginhimo batok sa iya apang ang ginalainan sini sang buot nga sa tunga sang health crisis nga ginapangatubang sang bilog nga kalibutan, nahimo pa nga ibutang sang mga ini ang seguridad sang mga pumuluyo sa alang-alang.
Sa pihak sini suno kay Gasataya, Diyos na ang bahala sa ila kag nagpangayo man ini sang pag-intindi sa mga pumuluyo nga angan-anganon ang mga foodpacks bangud ginatinguhaan man sini nga mahatagan ang tanan nga barangay sa ciudad.
Gin-athag sini nga ang mga tinawo sini ang nakauniporme sa tion nga manghatag ini sang foodpacks.
