Nagapati ang isa ka Bacoleño Bar passer sa ginatawag nga “right timing” sang Ginoo.
Apisar nga 2nd taker sa Bar exam si Atty. Annie Rose Rosales sang Purok Carvic, Barangay Mandalagan, Bacolod City, wala gid ini nadulaan sang paglaom nga malab-ot ang iya mga handom.
Suno sa iya, wala ginhatag sang Ginoo sa iya ang iya nga handom sang 2018 nga mangin isa ka abogado bangud indi pa ini handa.
Nagapasalamat gid siya nga sa ikaduha nga take, gin-grant na sang Ginoo ang iya nga pangamuyo.
Suno kay Rosales, dako gid ang nabulig sa iaya sang pagka-fail niya sa una nga exam bangud may yara na ini sang ideya sa 2nd take niya.
Suno diri, mas preparado na ang iya mindset.
Tuman man ang pasalamat sini sa iya support system ilabi na sa iya mga pamilya.
Suno diri, ang iya pamilya ang iya nangin salandigan sadto sang wala siya makapasar sa una nga take.
Ang mga ini man ang nangin rason agud magpadayon siya sa iya mga handom.
Antes pa man mangin abogado, certified public accountant na ining si Rosales.
Nagtapos ini sang elementarya sa ECTS III kag sa Negros Occidental High School ini nagtapos sang iya secondary level.
Sa University of St. La Salle-Bacolod naman ini nag-kolehiyo kag nagkuha sang kurso nga law.
Suno diri, sa tanan nga mga sirkumstansya nga maagyan, may yara gid ini sang purpose gani nga dapat magpadayon lang.
Nagalaom ini nga makahatag sang inspirasyon ang iya istorya ilabi na sa iban nga mga Bar takers nga wala nakapasar.
