Ginaduso sang gobernador sa Negros Occidental nga mabag-o ang desinyo sang Tamburong Bridge sa Ibid Creek, Sitio Tamburong, Brgy Biak-na-bato, La Castellana, Negros Occidental.
Ini ang ginpakigbahin ni Governor Eugenio Jose “Bong” Lacson kadungan sa pagkumusta sa iya sang sitwasyon sang probinsya ilabi na nga pila ka mga banwa kag ciudad ang napaidalom sa Storm Signals bangod sa Severe Tropical Storm OPONG.
Suno kay Lacson, nag-issue na ini sang memorandum nga nagadeklarar nga wala sang klase kasubong man trabaho sa mga opisina sang gobyerno bangod sa bagyo.
Kaina sang aga, may mga nareport naman nga pagbaha kaangay sa San Carlos City kag Hinobaan.
Panugyan sang gobernador sa mga Negrense nga magtinir na lamang sa balay kun wala man sang importante nga laktan, kag magsunod kun may ginapatigayon nga preemptive evacuation agud mapabilin ang zero casualties.
Sa pihak nga bahin, nagpasar naman sang resolusyon si Lacson nga mahatagan sang special permit ang mga commercial contractors nga makabulig sa paghakot sang volcanic debris nga nagatambak sa Ibid Creek kag nagatuga sang pagbaha.
Panawagan man sini nga dasigon ang pagtrabaho sa pagclearing sang sapa samtang wala pa sang ulan.
Aminado ini nga dako nga risgo sa mga pumuluyo sa lugar ang pagtambak sang mga volcanic materials.
Nakita sini nga agud indi magsupon kag magpanabaw sa sapa, dapat nga iredesign ang Tamburong Bridge kag padakuan ang buho sa idalom nga malusutan sang tubig.
Suno diri, sang gindesinyo ang taytay, wala napinsaran ang paglupok sang Bulkan Kanlaon ukon nga ini ang iligan sang lahar.
