Kadalag-an indi lamang sa mga transport group sa Bacolod kag Iloilo City kundi sa bilog nga transport sector sa Pilipinas ang desisyon sang Senado nga maghimo sang resolusyon nga magarekomendar kay President Ferdinand ‘Bongbong’ Marcos Jr. nga temporaryo nga suspendiron ang public utility vehicle (PUV) modernization program.
Sa interview sang Bombo Radyo Bacolod kay Kabakon Negros Transport Coalition Incorporated (KNETCO) President Lilian Sembrano, siya ang isa sa mga gin-imbetar nga maghambal sa Senate hearing.
Kun sa diin sang siya ang ginpamangkot ni Senator Raffy Tulfo, chairperson sa Committee on Public Affairs kun ano ang pangabay sini, ginpaathag ni Sembrano nga luyag nila nga isuspender kun indi ibasura ang PUV modernization program.
Para sa ila dako nga kadalag-an ang desiyon ni Senate President Francis ‘Chiz’ Escudero, kun sa diin ginmanduan sini si Tulfo nga maghimo sang resolusyon nga magapangabay sa Presidente sa temporary suspension.
Sa bulig sang Senado, dako ang posibilidad nga matuman ang handom sang mga ini nga liwat matugutan sa pagbyahe kag makarenew sang ila nga prangkisa.
Pinaagi sini mabalik sa normal ang ila palangabuhian kaangay sa sitwasyon antes paman ginpatuman ang PUV modernization program.
Paathag ni Sembrano nga sila ang indi batok sa PUV Modernization Program, apang panawagan nila nga ang programa ang mangin pro-people kag indi malubong sa utang ang mga driver kag operator tuga sang tuman ka mahal nga modernized jeepney unit.
