Ginpasalig sang Department of Education Division of Negros Occidental nga handa na for distribution ang certificate kag diploma sang mga estudyante, madayon man ukon indi ang graduation rites kag iban pa nga end of school year ceremonies samtang padayon pa ang coronavirus disease.
Nahibaluan nga ginpahayag kahapon ni Education Secretary Leonor Briones nga wala ginarekomendar sang DepEd ang pagpatigayon sang graduation ceremonies bangud extended ang enhanced community quarantine tubtub Abril 30.
Sa Visayas kag Mindanao naman suno sa tiglikom, madamo man nga mga local government unit nga nagdeklarar sang lockdown gani wala gina-engganyo sang DepEd ang graduation rites.
Sa interview sang Bombo Radyo Bacolod kay Ian Arnold Arnaez, public information officer sang DepEd Division of Negros Occidental, mas maayo nga tikang ang ginhimo sang Education Secretary agud indi na mabutang sa alang-alang ang ikaayong lawas sang mga ini.
Naggwa ang desisyon sang DepEd kasunod sang abiso sang Departnment of Health ukon DOH.
Samtang ginkompirmar man ni Arnaez nga ang tanan nga diploma kag certificates ang napreparar na kag ipanghatag na lamang ini.
Wala man sang dapat kahangaw-an ang mga graduating students nga indi makagraduate bangud pat-ud naman nga makagraduate ang mga ini kun nakapasa sang mga requirements.
