Ginpatigayon sang Department of Labor and Employment (DOLE) ang konsultasyon kaupod ang mga stakeholder nagikan sa sektor sang manufacturing, construction, kag agriculture sa Visayas kag Mindanao bilang kabahin sang kampanya batok sa child labor.
Ginpatpat sa nasambit nga konsultasyon ang mga suhestyon kun paano mapaayo ang mga sa karun nga pagsulundan agud masiguro ang safety kag legal nga proteksyon sang mga bata.
Tinutuyo sini nga i-revise ang Department Order No. 149 nga nagatumod sa mga delikado nga sahi sang trabaho para sa mga menor de edad.
Kaangay sang ginapatigayon nga konsultasyon sa Luzon, nakigbahin man diri ang mga eksperto nagikan sa Bureau of Workers with Special Concerns, Bureau of Working Conditions, Institute for Labor Studies, Occupational Safety and Health Center, kag International Labor Organization (ILO), agud nga maghatag sang mas madalom nga ihibalo sa pagdihon sang mga pagsulundan para sa welfare sang mga kabataan.
