Nagapadayon ang pagtrabaho sang Negros Electric and Power Corporation (NEPC) sa pagpanghawan sa dalanon ilabi na sa pagkakas sang mga gabok nga poste nga naga-apekto sa lakat sang trapiko sa Bacolod.
Sa interview sang Bombo Radyo Bacolod kay NEPC spokesperson Jonathan Cabrera, apat gikan sa lima na ka poste ang ila nakakas sa Luzurriaga Street, Bacolod City sa sulod lamang sang duha ka adlaw.
Suno diri, ang ini nga mga poste ang nagatindog sa tunga sang dalan nga indi lamang nakadistorbo sa lakat sang trapiko kundi ini pa ang delikado.
Sang Martes, ginkakas ang mga linya kag kahapon lamang sang aga ginkakas na ang mga poste.
Samtang, may yara man sila sang mga ginrespondehan nga mga nagatakilid nga mga poste, kag mga gabok na nga ila na lang ginpangkakas.
Dugang pa sini, isa pa gid sa dako nga pagpanghangkat sa ila ang madamo nga insidente kun sa diin nagakasapdingan sang kahoy ang linya sang kuryente nga masami ang rason sang pagbrown-out.
Pahayag ni Cabrera, ini tanan ang kabahin sang commitment sang NEPC sa paghatag sang maayo nga serbisyo.
