Matapos ang tatlo ka bulan, natigayon nga nadakpan sa ginpatigayon nga manhunt operation ang escapee sa Moises Padilla Municipal Police Station.
Madumduman nga nakapalagyo sadtong Oktubre 14, 2020 si Reco Layan, 23-anyos kag residente sang Barangay Quintin Remo matapos nga nagpa-abo-abo ini nga nagapin-ot ang dughan kag gin-alalayan sa sagwa sang police station para makasimhot sang fresh air apang ginkuha niya ang oportunidad agud magpalagyo.
Sa interview sang Bombo Radyo Bacolod kay P/Lt. Johnny Oro, deputy station commander sang Moises Padilla Municipal Police Station, ginpahayag sini nga nakabaton sila sang impormasyon nga nagapanago sa nabukid nga bahin sang Sitio Tios, Barangay Quintin Remo si Layan.
Paagi sa gintingob nga pwersa sang Moises Padilla PNP, Reconnaissance Company Regional Mobile Force Company 6, Philippine Army Charlie Company kag CAA, natigayon nila nga nadakpan ang escapee nga may yara sang kaso nga murder.
Nakuha sa possession kag kontrol sini ang isa ka MK2 Hand Fragmentation Grenade.
Sa karon yara na sa kustodiya sang Moises Padilla Municipal Police Station ang suspetsado para sa nagakaigo nga disposisyon.
