Liwat nga ginsabat ni Senate Minority Leader Alan Peter Cayetano si Senator Panfilo “Ping” Lacson matapos sini ginbalibaran ang imbitasyon nga i-inspect ang flood control projects sa Taguig.
Suno kay Cayetano, indi dapat kabalak-an ni Lacson ang pagbaha sa Taguig bangud dako ang pag-uswag sang flood control sa ciudad.
Ginpahayag sang senador nga madugay na nga ginpatigayon ang mga flood control project sa Taguig.
Suno diri, nag-umpisa ang dalagko nga plano sadtong panahon pa sang Martial Law, ginpatuman ang road dike sang 2001, ginpasangkad ini sa administrasyong Aquino, samtang ang proyekto nga ginahimuan sang isyu ang gin-umpisahan sang tion sang nakaligad nga administrasyon.
Ginpakigbato man ni Cayetano nga magluwas sa mabaskog nga mga pag-ulan, limitado na lamang sa pila ka mga lugar ang flash floods sa Taguig kumpara sa iban nga ciudad sa Metro Manila.
Nauna na nga nagpamalibad si Lacson sa imbistasyon ni Cayetano kag ginsiling nga magabisita lamang ini kun nakay-o na ang flood control program sa Taguig.
Suno diri, madugay na ini nga wala naka-ensayo sa paglangoy kag naglahog nga basi malumos ini sa tubig-baha sa Taguig.
