Ginabanta nga nagadangat sa 80 ka mga balay ang gintupok sang kalayo sa sunog nga nagluntad sa Purok Kagaykay, Barangay 2, Bacolod City pasado alas-3:00 kaina sang kaagahon, July 31.
Madamo sang mga residente nga nagtinguha nga makasalbar sang ila mga gamit kaangay sang refrigerator, washing machine kag cabinets, apang kalabanan ang nagtinguha gid lamang nga masalbar ang ila pamilya.
Ang kalayo ang nafireout kapin alas-5:00 subong nga aga kag sa karun nagapadayun pa ang mapping operations sang Bureau of Fire Protection.
Sa interview sang Bombo Radyo Bacolod kay Punong Barangay Emelda Banguanga, sa inisyal nga impormasyon ang kalayo ang nag-umpisa sa balay nga wala sang kuryente, gani ginalantaw nga posibilidad nga gintunaan sang sunog amo ang kandila.
Pahayag sini nga sang 2019, nasunugan man ang lugar kun sa diin nagdangat sa 215 ang balay nga ginlamon sang kalayo.
Dugang pa ni Banguanga nga may nagluntad man nga sunog sa lugar sang Pebrero subong nga tuig.
Bangod naga inikit-ikit lamang ang ginabanta 260 ka mga pamalay sa lugar, madasig nga maglapta ang kalayo.
Ginalantaw pa nga isaylo ang mga evacuees sa Barangay Hall ukon simbahan kaangay sa ginhimo sang tinalikdan, bangod sa karun ang mga biktima ang yara pa lamang sa open court.
