Ginaimbestigaran na sang Bacolod City Government ang basura nga gintambak sa isa ka pribado nga duta malapit sa Sum-ag bridge samtang ang tag-iya sang duta ang ginserbehan sang alkalde sang ciudad sang Cease and Desist Order.
Sa interview sang Bombo Radyo Bacolod kay Bacolod Environment and Natural Resources Office (BENRO) head Ma. Fe Trespuentes, natukiban sang mga ini nga may gintambak nga daan nga mga basura malapit sa taytay sang Barangay Sum-ag.
Suno kay Tresfuentes ang basura nga gintambak ang makita sa natuo nga bahin sang taytay kun halin sa South padulong sa north.
Naglab-ot ini sa ila nga igtulupangod sang Lunes sang aga bangud gintawag ang ila atensyon sang pila ka mga pumuluyo nga nagapuyo sa nasambit nga lugar.
Gilayon man nga nagpadala ang BENRO sang inspection team agud nga tsekyaron ang lugar.
Bangud sini natukiban nila nga may yara sang gintambak nga mga basura.
Suno diri, ang natabo may contractor nga nagtampok sang mga daan nga basura nga pila na katuig nga nahaboy bilang backfilling materials.
Ang mga basura ang gin-alegar naghalin sa daan nga dumpsite sang ciudad sang Bacolod sa Barangay Mandalagan.
Sa imbestigasyon sang BENRO natukiban nga gingamit sang contractor ang daan nga mga basura gikan sa daan nga dumpsite bilang filling materials bangud ang lugar ang nanubuan.
Indi man otorisado ang pagbutang sang mga daan nga basura sa nasambit nga lugar bangud indi ini ang disposal facility.
Kahapon ginserbe sang City Legal Office kaupod ang City Engineers Office kag BENRO sa representative sang tag-iya sang duta nga si Dante Fernandez ang Cease and Desist Order nga ginpanaog ni Bacolod City Mayor Alfredo Benitez agud nga mapauntat ang nasambit nga aktibidad.
Ginmando man sang alkalde sa tagiya sang duta nga kuhaon kag i-dispose sang husto ang mga basura nga gintambak sa lugar.
Suno kay Tresfuentes dapat kuhaon ang basura bangud delikado ini kun magkadto sa bodies of water.
Panugyan sini sa tanan nga dapat imanage sang husto ang basura bangud kun indi maabot ang panahon nga mangin dako nga problema sang ciudad ang basura dugang pa nga nagadamo ang tawo apang wala man nagalapad ang lugar.
