BACOLOD CITY – Ginatos ka mga pasahero ang stranded sa mga pantalan sa Negros Occidental bangud sa bagyo Basyang.
Alas-5:00 sang aga, ginpaidalom na sa public storm signal number 2 ang southern Negros Occidental samtang signal number 1 sa northern Negros kalakip na sa Bacolod City.
Sa interview sang Bombo Radyo Bacolod, ginpahayag ni Lieutenant Senior Grade Jimmy Oliver Vingno, commander sang Coast Guard Station Bacolod, nga indi magnubo sa 200 ang mga pasahero nga stranded sa BREDCO Port sa ciudad.
Nagadangat naman sa malapit 40 ang mga rolling cargoes nga magatabok kuntani sa probinsya sang Iloilo ang nagahulat nga makabiyahe.
Kalakip sa mga ini ang magadeliver kuntani sang utanon kag iban pa nga produkto sa Iloilo City nagikan sa Canlaon City, Negros Oriental.
Magluwas sa BREDCO Port, may mga stranded man sa iban nga mga pantalan sa probinsya sang Negros Occidental.
Kadungan sini, nagpanawagan si Vingno sa mga pasahero nga magpauli anay kag hulaton nga mabatak ang storm signal.
Samtang, kahapon pa lang, nag-anunsyar na si Bacolod City Mayor Evelio ‘Bing’ Leonardia sang kanselasyon sang klase sa pampubliko nga eskwelahan nagikan sa pre-school tubtub high school subong nga adlaw.
Padayon man ang monitoring sang City Disaster Risk Reduction and Management Office sa mga manubo nga lugar sa ciudad para sa posible nga pagbaha.
