Patay sa police operation ang ginakabig number 1 most wanted person sa Negros Oriental kahapon sang aga.
Ang akusado amo si Alex Manegos Mayagma, residente sang Brgy. Minaba, Bayawan City, Negros Oriental.
Ang insidente ang nagluntad sa rooster gamefarm nga ginapanag-iyahan ni suspended Cong. Arnulfo Teves sa Brgy. Malabugas, Bayawan City, Negros Oriental.
Sa joint operation sang Philippine National Police kag Armed Forces of the Philippines, ginserbe ang warrant of arrest nga nagresulta sa kamatayon sang akusado matapos ginaalegar nagbato sa arresting officers.
Base sa report sang kapulisan, nakita ang akusado sa nasambit nga lugar kag sang ini ang ginpalapitan sang operatiba, hinali nga naggabot sang armas-luthang si Mayagama kag nagtinguha nga magtiro apang ini napacify kag nakuhaan sang armas.
Apang, naggabot pa gid ini sang isa ka armas naggikan sa iya sling bag kag liwat nga naghana nga magtiro gani gilayon naman ini nga gintiro sang kapulisan bilang depensa.
Ini ang gindala sa malapit nga ospital apang gindeklarar nga dead on arrival.
Sa ginpatigayon nga marathon Senate hearing, makapila ka beses naggwa ang pangalan nga Alex Mayagma bilang isa sa mga responsable sa pagpamatay sa Negros Oriental.
May yara ini sang pending nga warrant of arrest sa kaso nga murder kag duha ka warrant of arrest sa pagbayolar sa RA 10591 ukon Comprehensive Firearms and Ammunition Regulation Act kag COMELEC gun ban.
