Nagpanawagan ang presidente sang Bacolod City Public School Teachers Federation sa gobyerno nga dugangan ang budget para sa edukasyon.
Sa interview sang Bombo Radyo Bacolod kay Richard Gelangre, principal sang Bacolod City National High School, madamo sang kabataan ang nagpa-enroll amo nga nagabalaka ini nga magdamo pa gid ang load sang mga manunudlo kasubong man nga magkulang ang mahatag nga resources sang buluthuan.
Suno diri, sa Bacolod City National High School may tatlo ka section nga kulang na gid ang bangko kun sa diin iban nga mga estudyante ang nagapungko na lamang sa salog.
Luyag sini sa karun nga makighinon-anon kay Bacolod City Mayor Alfredo ‘Albee’ Benitez nga kun tani mapadasig ang pagpakay-o sang mga classrooms kag kulang nga mga bangko.
Kasubong man nga luyag sini nga mapalab-ot kay Department of Education Secretary Sonny Angara nga kun tani madugangan ang national budget para sa edukasyon agud masolbar ang problema sa kulang nga classroom, textbooks, kag internet connectivity.
