Wala pa sa gihapon nakacomply ang Hacienda Asia Plantations Incorporated (HAPI) sa mga requirements sa pagbatak sang Cease and Desist Order (CDO) sa pagpa-untat sang operasyon sang palm oil plantation sa Brgy Gatuslao, banwa sang Candoni, Negros Occidental.
Madumduman nga naga-operate sang palm oil plantation ang HAPI sa kapin sa 6,000 hectares nga duta sa banwa bisan wala sang Environmental Compliance Certificate (ECC).
Suno kay Vicente Losbañes, Officer in Charge sang Environmental Management Bureau (EMB)- Negros Island Region, naghingyo ang HAPI nga i-lift ang CDO kag sila ginhatagan sang requirements apang tubtob sa karun wala sa gihapon may ginpasa ang HAPI.
Suno diri, wala sang may ginpasa nga plano kag disenyo sang siltation pond ang HAPI amo nga wala gin-grant ang ila ginapangayo nga pagbatak sa CDO.
Sa karun, santo sa monitoring, wala sang may namonitor nga padayon ang pag-operate sang palm oil plantation.
