Sa ilimnan dira mo mabatian ang patayog-tayog estorya nga kun kis-a nagadangat pa sa pag-ilinaway kag iban pa nga insidente.
Nakaagom sang pilas ang isa ka laborer matapos gintiro sang iya upod sa ilimnan sa Brgy. Acacia, Davao City.
Duha ka igo sang bala sa tuhod ang naangkon sang 50 anyos nga si Victor Hernale sang gintiro sang suspek nga si “Roland”.
Suno sa Davao City Police, naga-inom ang duha sa lugar sang ila gina-ubrahan sang hinali lang nga nanghangkat ang biktima nga tiruhon ini bangud nga “bulletproof” ang iya lawas.
Wala naman nagpangduha-duha ang suspek nga tiruhon ini agud nga mahibaluan kun bala matuod ang ginsugid apang ini ang naigo sang bala kag nasamaran.
Gindala sa Southern Philippines Medical Center ang biktima kag ginpaidalom sa operasyon bangud sa naagum nga pilas tuga sang pagluthang.
Naaresto naman sang mga otoridad ang suspetsado nga nagapangatubang sa karun sang kaso nga frustrated homicide, illegal possession of firearms under Republic Act 10591, kag violation sang Comelec gun ban.
