Nagpanindugan ang iloy sang ginpatay nga police samtang nagajogging sa reclamation area, Barangay 1, Pontevedra kahapon nga mabuot ang biktima kag mapinalanggaon man ini nga anak.
Sa interview sang Bombo Radyo kay Nenita Casugod sang Barangay Recreo, Pontevedra kag iloy sang biktima nga si Police Staff Sgt. Ildefonso Casugod, ginalantaw sini nga dako nga posibilidad nga ang pagpatay sa iya anak ang may kaangtanan sa iya trabaho.
Ginpahayag man sini nga masami nga may yara sang mga salakyan kag motorsiklo nga nagaparking malapit sa ila balay rason nga ginakuhaan niya sang mga plate numbers kag ginapadala sa Land Transporation Office (LTO) agud mahibaluan ang nagapanag-iya sang mga ini.
Suno sa iloy, kun kaisa nagaistorya man si Police Staff Sergeant Ildefonso Casugod sa iya nga may mga nakaengkwentro ini nga mga dalagko nga mga persona samtang ini ang nagapatigayon sang iya obligasyon bilang intel operative.
Ginpahayag man sang iloy nga Casugod nga indi man malipod nga may nabaton nga mga pagpamahog sa kabuhi ang anak sini apang nagpanindugan ang police nga wala siya sang dapat kahadlukan bangud ginahimo lamang sini ang insakto sa iya trabaho.
Damo man sang nakakilala sa iya anak kag wala man ini sang kontra sa ila palibot.
Ginapanawagan man sini nga mahatagan sang hustisya ang kamatayon sang iya anak.
