BACOLOD CITY – Nagapadayon ang imbestigasyon sang kapulisan sa pagbunggo sang traysikol sa isa ka nagaparada nga traktora sa Taytay Umapog, Brgy. Luna, ciudad sang Cadiz las-8:30 kagab-i.
Nahibaluan nga patay na sang mag-abot sa Cadiz District Hospital ang drayber sang traysikol nga si Celso Vito, 40-anyos kag subong man ang pasahero sini nga si Alejandro Vito, 56-anyos, nga pagadal-on kuntani sa hospital.
Pilason man ang tatlo ka iban pa nga pasahero sang traysikol nga sanday Joan Vito, 27-anyos; Dennis Templano, 34-anyos; kag Lyndon Vito, 15-anyos, nga karon lunsay ginabulong sa Corazon Locsin Montelibano Memorial Regional Hospital (CLMMRH).
Ang mga biktima lunsay pumuluyo sang Purok Masinadyahon, Brgy. Cadiz Viejo sang nasambit nga ciudad.
Suno sa inisyal nga pagpangusisa sang Cadiz City PNP, sa pagpanguna sang hepe nga si Police Supt. Edel Jose Manzano, one-way ang Taytay Umapog bangud sang nagapadayon nga asphalt overlay sang DPWH apang didto man nagaparada ang traktora sang hinali ini nabungguan sang traysikol.
Sa karon padayon nga gina-imbestigar kun reflectorized ukon nagaiwag sa malayo ang early warning device sang traktora.
Samtang, yara sa kustodiya sang kapulisan ang driver sang traktora nga si alias Reynan.
