Indi na makatilingala ang pagpadismiss ni Vice President Sara Duterte sa petisyon nga ginfile sa Korte Suprema nga nagakwestyon sang constitutionality kag legality sang P125 million confidential intelligence funds sang Office of the Vice President (OVP).
Sa interview sang Bombo Radyo Bacolod kay Atty. Isagani Zarate, Executive Vice President sang Bayan Muna, wala na sila nakibot sa pagfile ni VP Sara Duterte sang dismissal sa petisyon sa korte bangud ini ang speculative.
Nagpanindugan si Zarate nga indi espekulasyon ang pagkwestyon nila sang constitutionality sang pagtransfer sang P125 million confidential intelligence funds sa Office of the Vice President (OVP) gikan sa Office of the President.
Suno diri, wala sila nagahaom-haom sang ila pagkwestyon bangud may record nga halin sa Commission on Audit (COA) nga nabaton sang opisina sang bise presidente ang nasambit nga pondo kag nagasto ini sa sulod lamang sang 11 ka adlaw.
Suno kay Zarate, pati ang opisina sang presidente ang madalahig man bangud wala ini sang kinamatarong nga magsaylo sang pondo bangud wala sang layi nga nagpahanugot sini.
Suno diri, ang presidente ang yara sa executive gani dapat magapatuman lamang ini kun ano ang nakasaad sa layi.
Nagapanawagan man ang mga ini nga untaton na ang paghatag sang confidential intelligence funds sa mga civilian agencies agud malikawan ang pork barrel, kasubong man ang pagkadula sang pondo sa mga importante nga proyekto sang gobyerno.
