Nagrequest ang otoridad sa Indonesia sang prisoner swap sa Pilipinas, kabaylo kay dismissed Bamban, Tarlac Mayor Alice Guo.
Ginkumpirmar ni Justice Secretary Jesus Crispin ‘Boying’ Remulla nga nagrequest ang Indonesian authority nga ihatag sa ila ang kustodiya sa Australian national nga si Gregor Johann Haas, nga nagapangatubang sang kaso nga drug smuggling kag naaresto sa Pilipinas sang Mayo.
Suno kay Remulla, ila pa nga ginatun-an ang komplikasyon sang request kag may iban pa nga issues sa tunga sang Indonesia kag Pilipinas nga dapat maresolbar.
Wala pa ginkumpirmar ni Remulla kun magasugot ang gobyerno sang Pilipinas sa offer sang Indonesia.
Ginkumpirmar sang Presidential Anti-Organized Crime Commission (PAOCC) nga si Guo ang naaresto sa Tangerang City, Indonesia kahapon sang kaagahon, kag ini ang yara na sa kustodiya sang kapulisan sa Indonesia.
Nahibaluan nga si Guo ang gina-akusaran sa koneksyon sini sa mga ginraid nga Philippine offshore gaming operator (POGO) sa Bamban, kag nagapangatubang sang mga complaint nga qualified human trafficking, money laundering, kag tax evasion.
Suno sa legal team sang anay alkalde, ang pagka-aresto kay Guo ang ginakabig nila nga welcome development kag oportunidad agud ini ang makasabat sa mga alegasyon batok sa iya.
