Ginalauman nga makighinun-anon si Israeli Prime Minister Benjamin Netanyahu sa iya security cabinet agud istoryahan ang plano sang Israel Defense Forces (IDF) nga amat-amat nga i-invade ang Gaza City sa pihak sang tuman nga international condemnation sa nagalala nga humanitarian crisis sa rehiyon.
Suno sa isa ka opisyal sang Israel, pagahingyuon ni Netanyahu sa cabinet nga aprubahan ang tikang agud masakop na ang Gaza Strip.
Natalana nga suguran ang meeting alas 6:00 sang gab-i, local time.
Gin-istoryahan ang natuhoy sa issue sa sulod sang tatlo ka oras nga meeting sang limitado nga security cabinet sang Martes.
Ginpahayag man sang isa ka Israeli official nga luyag ni Netanyahu nga mas palaparon pa ang operasyon sa Gaza bangud nagapati ini nga indi interesado ang Hamas sa panibag-o nga kasugtanan para sa pagpahilway sang mga hostages.
