BACOLOD CITY — Pagapatulugon ni Senator Manny Pacquiao si Autralian Boxer Jeff Horn sa sulod sang lima ka rounds.
Ini ang fearless forecast ni anay Philippine Olympic Committee (POC) Chairman kag anay Bacolod City Mayor Monico Puentevella sa July 2 fight sang Pinoy Ring Icon kontra sa teacher-turned-boxer nga si Horn.
Suno kay Puentevella, wala sang duda nga magadaog si Pacquiao apang kun tuod-tuoron sang People’s Champ, mahimo sini mapatulog ang Australiano sa sulod pa lamang sang lima ka round.
Ini bangud nga uhaw ini sa knockout win matapos ang pito katuig nga wala ini sang may napatulog sa ibabaw sang ring.
Apang suno kay Puentevella, mahimo man nga apisar masarangan sini nga tumbahon si Horn, palawigon ni Pacman ang sambuwa agud nga indi man mabitin ang mga tumalan-aw.
Ugaling wala sang excitement suno sa iya ang sambuwa ni “Fighting Senator” Manny Pacquiao kag Australian boxer Jeff Horn sa maabot nga Hulyo 2.
Suno kay Puentevella, nasundan sini ang mga away ni Pacquiao humalin sang una sini nga sambuwa sa Las Vegas apang sa tanan nga match, ang pag-atubang ni Pacman kay Horn ang pinaka-wala ginakalangkagan bangud indi man kilala si Horn indi kaangay sang mga naengkwentro ni Pacquiao sadto nga sikat nga mga ngalan sa patag sang boksing nga ginalakipan nanday Oscar dela Hoya kag Floyd Mayweather Jr.
Isa ka pamatuod diri, suno kay Puentevella, amo ang indi na pagpa-pay-per-view sang Pacquiao-Horn fight kag sa baylo, libre ini nga malantaw sa isa ka sports channel.
Apang nagapati man si Puentevella nga mahatagan lamang sang excitement ang away kun malagpatan ni Horn sang tapungol si Pacquiao sa sag-ang ukon sa suluk-sulok.
