BACOLOD CITY – Magapatigayon sang special voter’s registration ang Commission on Elections (Comelec) subong nga adlaw, Marso 8, kadungan sang selebrasyon sang International Women’s Day.
Sa interview sang Bombo Radyo Bacolod kay Provincial Election Supervisor Atty. Jessie Suarez, ginpahayag sini nga ila pagahatagan sang prayoridad ang mga kababainhan nga magapa-rehistro agud makabotar sa palaabuton nga piniliay-binaranggay sa maabot nga bulan sang Oktubre.
Sa pagkamatuod, suno kay Atty. Suarez, ang bug-os nga bulan sang Marso ang ginadedikar nila sa mga kababainhan bilang kabahin sang pag-obserbasyon sang International Women’s Month.
Apang gilayon sini ginklaro nga wala ini nagakahulugan nga lunsay babayi lamang ang mahimo makaparehistro bangud ila man akomodahon ang mga kalalakin-an sa voter’s registration.
Ang Comelec nagdesignar sang mga satellite registrations sa mga kabaranggayan kag nakahanda man sila magpadulong sa mga eskwelahan kun hingyuon.
Sa karon, wala pa sang satellite registration sa mga malls apang suno kay Atty. Suarez, magapatigayon sila sini antes magtakop ang voter’s registration sa Abril 29.
