Iga-monitor sang Department of the Interior and Local Government (DILG) – Bacolod ang pagpatigayon sang Oplan Kontra Baha.
Ang national program ang ginlunsyar subong nga adlaw sa Mambuloc Creek sa Brgy 10, Bacolod City.
Wala naman naka-abot si President Ferdinand “Bongbong” Marcos Jr sa launching, apang ini ang ginsuguran na sa pagpanguna sang pila ka mga national officials kag opisyales sa Bacolod City.
Sa interview sang Bombo Radyo Bacolod kay DILG-Bacolod Director Christian Nagaynay, ang programa ang gin-angot na lamang nila sa commitment sang Barangay sa ila nga Kalinisan Program.
Suno diri, ang kada Barangay ang required nga magsumiter sang ila accomplishment report tuhoy sa Kalinisan Program sang kada Barangay, kag bilang commitment sa Oplan Kontra Baha, ginmando sini nga ifocus sang mga Barangay nga may-ara sang sapa ukon suba ang ila mga operasyon sa mga waterways.
Pahanumdom ni Nagaynay nga obligasyon sang tagsa ka Barangay ang pagtipig sa mga waterways nga yara sa ila nasakupan.
Sila ang may quarterly assessment man sa Kalinisan Program kun sa diin ginasumiter ang numero sang mga nagpartisipar kasubong man ang volume sang basura nga nahakot.
Kun ang isa ka Barangay ang indi makasumiter sang report, sila ang padal-an naman sang memorandum notice kag ini ang icopy furnish man sa alkalde kag Sangguniang Panlungsod.
Kasunod sang failure ang mga Barangay ang ginapasumiter sang eksplinasyon kag ginapost man nila sa social media kun ano nga Barangay ang wala sang report ukon wala gid nakapatigayon sang Kalinisan Program sa bilog nga semana.
Pinaagi sa paglink sang Kalinisan Program sa Oplan Kontra Baha, nagapati si Nagaynay nga mangin tayuyon ang clearing activity kag ang pagtipig sa mga waterways sa ciudad.
