Nagapadayon sa gihapon ang imbestigasyon sang mga kapulisan kag National Bureau of Investigation (NBI) Bacolod sa tatlo ka persona nga gin-alegar nga gin-abduct sa Barangay Vista Alegre, Bacolod City sang Hunyo 2.
Sa interview sang Bombo Radyo Bacolod kay Police Major Joery Puerto, pinuno sang Investigation and Detective Management Unit sang Bacolod City Police Office, nagashare sila sa karun sang NBI sang makuha nga impormasyon nga may kaangtanan sa sa gin-alegar nga pag-abduct sa ka live-in ni Trisha Antiquera nga si Junel Nangan; Loreville Antiquera nga iloy ni Trisha kag live-in partner ni Loreville nga si Joen Villacojer sang Hunyo 2 sang gab-i.
Suno kay Puerto, ginalantaw nga may madalom nga rason sa pagkadula sang mga missing persons bangud si Villacojer ang madamo ang kaso.
Isa sa ginalantaw amo nga mahimo may yara ini sang nakulantro nga grupo.
Samtang si Loreville naman ang nadakpan sadto sa kaso nga nagapameke sang valid IDs apang si Junel ang konductor sa modernized jeep.
May nakuha naman nga CCTV footage apang ang nakuhaan lamang ang Avanza nga puti nga ginsakyan sang mga nadula.
Suno kay Puerto, nakadepende man sa NBI kun may makuha pa ang mga ini nga lain nga CCTV footage nga makabulig sa imbestigasyon.
Sa karun wala pa mahibaluan kun sa diin na ang tatlo ka persona nga nadula.
