May person of interest na ang mga kapulisan sa kaso sang pagpatay kay Pearl Joy Galve.
Sa nauna nga nterview sang Bombo Radyo Bacolod kay Police Lt. Col. Lymel John Pasquin, hepe sang La Carlota City Police Station, ginpahayag sini nga ginahulat pa nila ang resulta sang autopsy examination samtang sila ang padayun man nga nagakoordinar sa Bacolod Police Station 9.
May mga tawo naman ini nga ginpa-imbestigar sa lugar sa La Carlota kun sa diin gina-alegar nakit-an si Pearl Joy antes masapwan ang iya nga bangkay.
May nakuha man sila nga mga CCTV footage apang indi conclusive gani sila ang nagapatigayon pa sang backtracking sa kun sa diin ini mahimo nakalabay kag nagalaom nga makakuha sang mas maathag nga lead.
Madumduman nga si Pearl Joy ang nadula sang Hulyo 29 sa Barangay Sum-ag, Bacolod City.
May nakakita sa iya sang Agosto 3 sa La Carlota City nga nagapakadto-pakari sa atubang sang isa ka karenderia kag sang Agosto 13 nasapwan na lamang ang bangkay sini nga nagaka-agnas na sa sulod sang kampo sang tubo sa Hacienda San Roque, Brgy. Cubay, La Carlota City.
Samtang sa interview sang Bombo Radyo Bacolod kay Negros Occidental Police Provincial Office (NOCPPO) Director Police Col. Rainerio de Chavez, may-ara na sang person of interest sa kaso.
Sa karun indi pa nila mapagwa ang pangalan, apang pasalig sini nga mahimo madali na lamang masolbar ang kaso.
Samtang pasalig naman sini sa mga pumuluyo nga sila ang indi dapat magkabalaka bangod indi matuod ang nagalibot nga balita nga may natuhoy sa mga van nga nagapang-abduct, kag nagpasalig nga ang mga kapulisan ang padayun nga nagabantay sa komunidad.
Ginmando naman sini ang pagpasanyog pa sang police visibility sa tagsa ka mga hepe sang kapulisan sa probinsya.
