BACOLOD CITY — Nagsaka sang duha ka porciento ang kadamuon sang mga nabiktima sang dengue sa isla sang Negros.
Ini ang ginkumpirmar ni Department of Health Negros Island Region (DOH NIR) Director Dr. Emilia Monicimpo sa exclusive interview sang Bombo Radyo Bacolod, base sa record humalin Enero tubtob Hunyo 2017 kun ikumparar sa kasubong nga period sang nagligad nga tuig.
Suno kay Dr. Monicimpo, diri lamang sa Negros Occidental, naglab-ot na sa 1,203 ang kaso sang Dengue kun sa diin 13 na ang nagkalamatay.
Ini ang mas mataas ikumparar sa 1,174 ka mga kaso sang nagligad nga tuig kun sa diin lima lamang ang nagkalamatay.
Sa 13 nga ginbawian sang kabuhi bangud sa Dengue sa Negros Occidental sa una nga anom ka bulan sang 2017, lima diri ang gikan sa ciudad sang Bacolod.
Sa pihak sini, ginklaro sang DOH-NIR Director nga wala pa sang rason agud maalarma bangud uno porciento lamang ini sang kabug-usan nga numero.
Ginapanawagan naman ni Dr. Monicimpo sa publiko nga mangin matinlo kag masami nga lumpyuhan ang palibot agud malikawan ang pagpugad sang lamok nga may dala nga Dengue.
