BACOLOD CITY — Padayon pa nga ginatumod kun ano ang source sang indi mahangpan nga baho nga nagresulta sa paglingin sang ulo kag pagpalanuka sang pila ka mga estudyante kag ginikanan sa duha ka mga eskwelahan sa ciudad sang Talisay, Martes sang aga.
Nahibaluan nga ginsuspendi ang klase sa duha ka mga eskwelahan sa amo nga ciudad bangud sang tuman nga kabaho.
Sa rekord sang City Health Office sang Talisay, siyam ka mga estudyante, isa ka ginikanan kag isa ka maestra sa Talisay South Elementary School samtang walo naman ka estudyante sa UNO-R Talisay ang naglain ang pamatyag kadungan sang nagdapya nga mabaho nga hangin nga ginapatihan naghalin sa gwa sang eskwelahan.
Suno sa principal sang Talisay South Elementary School nga si Susan Panique, mapangsot nga daw may yara sang muriatic acid kag ammonia ang hinali lang nga nagdapya amo gani nga na-suffocate ang mga kabataan kag ginikanan kag mangin ang maestra.
Bangud sini, nagdesisyon ang district supervisor nga isuspend nalang ang klase agud nga makapahuway ang mga natungdan.
Suno kay Talisay City Health Officer Dr. Joy Guanzon, wala pa natumod kun ano ang source sang baho amo gani nga ila pa nga libuton ang lugar agud nga ini ang madeterminar.
Apang ginapatihan man nga isolated lamang ini bangud hinali man nga nadula.
Gilayon man nakapauli ang mga kabataan matapos nga nahatagan sang pagbulong.
