BACOLOD CITY — Ginlibot gid sang duha ka mga engineer ang Bacolod City National High School agud lamang nga makita ang tag-iya sang kwarta nga ila napulot sa gwa sang gate sang eskwelahan, Miyerkules sang aga.
Bangud nagapati nga taga-BCNHS ang tag-iya sang cash, nagsulod sa eskwelahan sanday Engr. Nelson Dennis Trillanes kag Engr. Rey Locsin sang DPWH 4th District Engineering Office sa Bago City agud pangitaon ang tag-iya.
Ginradyuhan sang head sang English Department nga si Generose Entrina ang tanan nga department sa eskwelahan agud ipaalinton kun sin-o ang nadulaan sang kwarta.
Gilayon naman nga natumod nga si Vonessa Miraflores, science teacher sa BCNHS, ang nagapanag-iya sini.
Tuman naman ang kalipay sini matapos nga nabalik ang iya P5, 000 nga cash nga nawigit.
Gintanyagan sang reward ang duha ka mga engineer apang nagpamabalibad ang mga ini nga batunon.