Bangod sa nagapadayon nga pagsaka sang gasolina, ginalantaw sang Trade Union Congress of the Philippines (TUCP) nga magatuga man ini sang pagsaka sang presyo sang iban pa nga mga produkto kag serbisyo sa pungsod.
Suno kay TUCP Spokesperson Alan Tanjusay, kadungan sa pagsaka sang presyo sang gasolina, ang ikasarang sa pagbakal sang mga minimum wage employees ang nagnubo man.
Bangod sini, ila na nga gina-ekspektar nga magasaka man ang plete kasubong man ang iban pa nga mga produkto kag serbisyo.
Suno kay Tanjusay, ila sa karun ginatsekyar kun ano ang sitwasyon sa palibot ilabi na sa bahin sang mga jeepney drivers.
Dugang pa sini nga dako na para sa mga jeepney driver karun ang makapuli sang P300 apang kun kaisa tubtob nalan sa P100 ang mapauli sang mga driver para sa isa ka adlaw nga pagbyahe.
Kadungan sa paglantaw sa sitwasyon sang drivers, ginabalanse man sang TUCP ang kapasidad sang mga trabahante.
Ilabi na sa ginaduso nga pagsaka sang plete nga P3.
Suno kay Tanjusay, isa sa ponto nga dapat ikonsiderar sang Bacolod Inter-Agency Task Force ang pagpasaka sang seating capacity sa mga passenger jeepney agud nga mapahagan-hagan ang sitwasyon.
Pahayag sini nga pinaagi sa pagpasaka sang passenger capacity, indi na kinahanglan nga I-absorb sang mga pasahero ang kabudlayan sa pagsaka sang pamasahe.
Dako na nga palas-anon ang P6 sa balikan nga byahe para sa mga mamumugon suno sa tagpamaba.
Nagapati si Tanjusay nga dako ang mabulig sang pag-adjust sang kapasidad sang mapasakay nga pasahero agud mapahagan-hagan ang pagsaka sang plete.
Suportado man sang TUCP ang proposal sang isa ka consumer group nga ipaiway ang excise tax sa fuel sa idalum sang Train Law.
Suno kay Tanjusay, pinaagi sini dako ang mabuhin sa presyo sang gatong, gani mahimo man nga mapanubo ang hingyo nga pagpasaka sang P3 sa plete.
Ginalantaw man sang mga ini ang sitwasyon sang mga minimum wage earners sa mga probinsya, kalakip na sa syudad sang Bacolod nga masobra tinuig na nga wala sang pagsaka.
Apang sa pihak sang stagnant nga minimum wages, ang presyo sang mga balaklon kag gasolina ang wala naman naga-untat sa pagsaka gani naganubo man purschasing power sang mga pumuluyo.
Pahanumdom ni Tanjusay sa Land Transportation Franchising and Regulatory Board (LTFRB) nga ikonsiderar ang mga nasambit nga factor sa pagdesidar kun pila ang ipasaka sa presyo sang plete.
