BACOLOD CITY – Padayon pa ang imbestigasyon nga ginapatigayon sang Moises Padilla Municipal Police Station kaangot sa pagtiro-patay sang armado nga mga lalaki sa isa ka persona sa amo nga banwa, kagab-i.
Dead on the spot ang biktima nga si Ronnie Mamilla sang Sitio Haroy, Barangay Montilla, matapos nga ginpaarakan sang luthang sang mga suspetsado pasado las 6:00 ang takna sa gab-i.
Sa exclusive interview sang Bombo Radyo kay Police Officer 2 Felix Pesales Jr., imbestigador sang Moises Padilla Municipal Police Station, tatlo ka mga persona nga ginaalegar mga miyembro sang special partisan unit ukon SPARU sang new people’s army ang nagtira sa biktima.
Sa inisyal nga imbestigasyon sang kapulisan, naga-inom ang biktima sa ila nga puluy-an sang ginluthang sang mga suspetsado.
Una diri, nagtawag sa bombo radyo ang himata sang biktima bangud sa indi pagresponder sang mga pulis apang ginpaathag ni PO2 Pesales nga indi sila maka-penetrate sa lugar kagab-i bangud rebel-infested area kag delikado amo gani nga hulaton nila nga magsanag agud nga makapadalom sang imbestigasyon.
Ang Sitio Haroy ang 20 kilometros halin sa banwa kag indi masulod sang patro car sang pulis.
