Ginbawian sang kabuhi ang lalaki sa Rayong, Thailand nga wala nagkaon sang ano man nga pagkaon apang naga-inom sang makahulubog nga ilimnon sa sulod sang isa ka bulan.
Naabtan sang rescue workers nga wala na sang kabuhi sa sulod sang balay si Thaweesak Namwongsa, 44 anyos, divorced kag amay sa 16 anyos nga bata nga lalaki.
Suno sa teenager, naga-inom lamang sang beer ang iya amay sa sulod sang isa ka bulan kag sang nagpauli siya halin sa eskwela na-seizure ang iya amay kag nakita niya nga madamo sang botilya sang beer nagalapta sa kwarto.
Suno pa sa bata, iya ginalutoan sang pagkaon ang iya amay antes mag-eskwela apang wala man sini ginakaon.
Mahibaluan nga apisar madamo sang calories sa beer, kulang ini sa gihapon sang essential nutrients kag ang pagsalig diri bilang food replacement magaresulta sa seryuso nga risgo kalakip na ang nutrient deficiency kag liver damage bangod sa alcohol content.
