BACOLOD CITY — Padayon nga pamatukan sang Save Hinobaan Movement kag Defend Patrimony Southern Negros ang ginadihon nga proyekto sang provincial government sang Negros Occidental kag sang Tsuneishi Heavy Industries nga nabase sa pungsod Japan kag patindugon sa Barangay Bacuyangan, banwa sang Hinobaan.
Sa interview sang Bombo Radyo kay Jimwell Caniedo, lead convenor sang Save Hinobaan Movement, nagapamatok sila sa pagpatindog sang ship recycling facility bangud mahimo lamang ang ila banwa nga basurahan sang mga daan nga barko.
Bangud 80 ektariyas ang duta nga gamiton sa Sitio Obong kag Salvacion sa amo nga barangay, indi magnubo sa 500 ka mga balay ang kinahanglan nga magsaylo.
Magluwas diri, may mga puno man sang kahoy kag sang mangroves nga pang-utdon kag indi maayo sa dunang-manggad.
Nahibaluan nga sang nagligad nga binulan, gin-aprubahan na sang Sangguniang Bayan sang Hinobaan ang ordinansa nga iconvert ang duta halin sa agricultural padulong sa industrial agud nga mangin kabahin sang industrial zone sang banwa.
Suno kay Caniedo, madamo nga mga grupo kag pumuluyo sa Hinobaan ang nagapamatok sa amo nga proyekto.
Apang, gindula sang alkalde sang Hinobaan ang kahangawa sang mga pumuluyo sa Barangay Salvacion nga madulaan ang mga ini sang balay kag palangabuhian sa tion nga matigayon na ang pagtindog sang ship recycling facility sang Tsuneishi Heavy Industries sa amo nga lugar.
Sa interview sang Bombo Radyo kay Hinobaan Mayor Ernesto Estrao, ginpasiguro sini nga ginaproseso na sa karun sang municipal government ang pagpatindog sang relocation site para sa mga pumuluyo sa Sitio Obong kag Salvacion nga kinahanglan magsaylo sang balay.
Nahibaluan nga santo sa kasuguan, indi pwede mademolish ang mga balay kun wala sang relocation site para sa ila.
Magluwas diri, ginaproseso naman sang banwa suno kay Estrao ang livelihood assistance para sa mga residente.
Paathag sang alkalde, iya sang provincial government sang Negros Occidental ang proyekto kag bilang amay sang banwa, natuon siya sa tunga-tunga kag indi niya luyag niya mabiktima sang pagpamigos ang mga Hinoban-on.
Suno pa kay Estrao, wala sang dapat nga kulbaan ang mga residente bangud madugay pa antes magtindog ang ship recycling facility bangud ginaproseso pa sang investor ang madamo nga papeles nagikan sa nagkalain-lain nga ahensya sang gobyerno.
Kadungan sini, nagpangabay ang alkalde sa mga grupo nga indi magsinggitan nga makahalit ang pasilidad sa palibot bangud ang DENR kag Environmental Management Bureau lamang ang makahambal sini.
