Lima ka mga motorsiklo, nadamage matapos gindalasa sang nakapark nga truck sa Sagay

Lima ka mga motorsiklo ang nadamage matapos gindalasa sang isa ka truck nga nakapark kuntani sa ciudad sang Sagay.

Sa impormasyon nga nakuha sang Bombo Radyo, madiskarga kuntani sang bugas nga sinako ang isa ka truck de kargo nga ginamaneho ni Ricky Devilla, 27 anyos kaupod ang iya helper nga si Gilbert Pala sa Sagay City Public Market.

Suno kay Devilla, sang iya ini ginpark, ginplastar sini sang maayo ang truck kag ginpatay ang engine apang sang nanaog na sila kag naglibot sa likod nga bahin sang salakyan, hinali lang ini nga nag-abante.

Bangud may mga motorsiklo nga nakapark tatlo tubtob lima ka metro ang kalayuon sa truck, nadalasa ang mga ini kag lima diri ang nasamaran.

Wala naman sang tawo nga nadalahig ukon napilasan sa insidente.