Naka-issue na sang 239 ka mga stickers ang Land Transportation Franchising and Regulatory Board (LTFRB) Region 6 para sa mga consolidated traditional jeepneys sa ciudad sang Bacolod.
Sa interview sang Bombo Radyo kay Bacolod City Administrator Dr. Lucille Gelvolea, ang stickers ang gin-issue samtang yara pa sa interim period.
Paathag sini nga ang Provisional Authority sang mga consolidated traditional jeepneys ang tubtob sa Disyembre 31 subong nga tuig, kag antes sini dapat mabuslan na sang modernized jeepney units.
Nagalaom ini nga amat-amat naman maga-abot ang dugang nga modernized jeepneys sa ciudad.
Ang QR Code naman nga yara sa sticker ang ginbutang bilang control.
Suno diri, ang mga stickers ang sarang mapalaminate sang mga drivers kag ipakabit sa atubang sang salakyan, kag mahimo man nga ini ang ipilit sa salakayan
Ini ang magaserbe nga basehan sa mga otoridad sa pagtumod sang mga nakapaconsolidate batok sa mga colorum ukon unconsolidated traditional jeepneys.
Nahibaluan nga ang mga colorum ang sarang na nga madakop sumugod sa Mayo 16.
Paathag ni Gelvolea nga ang iban nga mga naghingagaw nga magpaconsolidate ang yara pa sa LTFRB Region 6 kag ginahulat pa kun sila ang maaprubahan.
Sa karun, indi pa mapanagtag ang sticker bangod wala pa nakapagwa sang provisional authority ang LTFRB.
