BACOLOD CITY – Ginpapauli na ang 19 ka mga mangingisda nga napadpad sa ciudad sang Bayawan sa probinsya sang Negros Oriental kag gin-imbestigaran sang mga pulis sang nagligad nga adlaw.
Sa impormasyon nga ginpadangat sang Bayawan City Police Station sa Bombo Radyo Bacolod, nagakahangawa ang mga residente sa lugar matapos napadpad diri ang fishing boat sang Domingo sang hapon bangud sa mabaskog nga hangin.
Sa pag-usisa sang mga pulis, wala sang ginpakita nga nagakaigo nga dokyumento ang mga sakay sang F/B Hermen gani ginkustodiya sang otoridad ang mga crew samtang yara naman sa Philippine Coast Guard ang motorbanca.
Gin-usisa man sang mga pulis sa Zamboanga del Norte kag na-verify man nga sila ang legitimate nga residente sang Barangay Taplon sa banwa sang Jose Dalman sa amo nga probinsya.
Nahibaluan man nga ginapanag-iyahan ni Councilor Herbal Abapo sang Sindangan, Zamboanga del Norte ang fishing boat nga ginapamunuan ni boat captain Clark Junfrin Ladiana.
Bangud wala naman sang kwestiyon, ginpahanugutan na sang mga pulis nga makapauli ang mga mangingisda apang ginbilin sa kustodiya sang Coast Guard ang ila nga sakayan.
