Indi lamang Negros Occidental ukon Talisay City ang makapabugal sa “Manok ni Cano Gwapo” hotel, kundi bilog nga Pilipinas.
Ini matapos nga gindeklarar sang Guinness Book of World Records bilang “Worlds’ largest building in a shape of chicken”.
Sa interview sang Bombo Radyo Bacolod kay former Bacolod City Councilor Ricardo “Cano” Tan, tag-iya sang Campuestohan Highland Resort sa Talisay City, tuman ang kalipay sini nga siya ang makabilin sang legasiya indi lamang para sa ciudad ukon sa probinsya, kasubong man sa bilog nga kalibutan.
Malipayon ini nga mapagkit sa Guinness Book of World Records ang tinaga nga “Cano, Gwapo kag Manok”.
Suno diri, sa iya mismo naghalin ang konsepto nga himuon nga kalaragway sang sulog nga manok ang hotel kag ini ang wala sang architect, sa baylo ang iya desinyo ang ginpadrawing lamang sini sa mga artist.
Paathag sang negosyante nga palangga sini ang inugbulang nga manok kag gusto niya nga mahatagan sang pagkilala ang game fowl industry nga dako nga bulig sa tion sang sugar crisis nga nagpabudlay sa mga Negrense sang 1980s.
Ang hotel nga kalaragway sang manok ang may kataason nga 114 feet and 7 inches, tatlo ka panalgan kag may 15 ka kwarto.
Mahimo man nga makasaka sa parong sang manok para sa aerial viewing.
Sa tiilan sang hotel, yara man nagasugata ang duha ka human-size nga estatwa sang manok kag may mga desinyo nga katubuhan sa kilid.
Samtang sa kada kwarto may ara man nga miniature version sang sulog nga manok nga nahamtang sa table.
Sa nasambitan nga resort, ginaconstruct man sa karun ang target nga mangin “worlds’ longest water slide”.
