Gin-imbitar sang festival director sang MassKara Festival ang mga pumuluyo sang ciudad sang Bacolod nga suportahan ang Kick-off Salubong sang festival karon sa hapon tubtub gab-i sa grounds sang Bacolod City Government Center.
Sa interview sang Bombo Radyo kay Atty. Pinky Mirano, alas-4:00 sa hapon magasugod ang una nga mga aktibidades sa BCGC grounds samtang ang formal opening ang patigayunon alas-7:00 sa gab-i tubtub na sa countdown.
Ang singer nga si Rico Blanco ang mayor nga performer sa Opening Salvo sang festival samtang may DJ naman nga magapatukar tubtub alas-2:00 sa kaagahon sa Oktubre 1.
Kahapon sang aga, isa ka misa ang ginpatigayon agud pangamuyuan ang maayo nga dalagan sang panahon kadungan sang Opening Salvo bwas.
Nagalaom si Mirano nga magabuligay ang tanan para sa matawhay nga festival kag magaenjoy lang ang mga bisita.
80 naman ka mga kiosko ang ginpatindog sa palibot sang plaza samtang indi naman magnubo sa 100 sa grounds sang Bacolod City Government Center samtang ginatarget naman nga mabutang sang mga kiosko sa Baywalk sa reclamation area.
Sa pihak nga bahin, may mga barangay nga gintawgan agud iproseso na ang requirements para sa ayuda.
17 sa Street and Dance Competition samtang 13 naman ang mapasakop sa Electric MassKara.
Ang mga barangay nga makigbahin sa Street and Dance Competition ang magabaton sang P200,000 nga subsidy samtang P150,000 naman ang batunon sang makigbahin sa Electric MassKara.
Ang Yuhom Foundation naman ang magahatag sang P300,000 financial assistance sa street dance contenders kag P150,000 sa Electric MassKara participants.
