Ginakalipay sang Presidente sang Samahang Weighlifting ng Pilipinas nga may allowance na nga ginhatag sa mga representatives sang Pilipinas para sa 2024 Paris Olympics.
Sa interview sang Bombo Radyo Bacolod kay Monico Puentevella, ginapasalamatan sini nga naghatag sang oras kag speech si President Ferdinand ‘Bongbong’ Marcos Jr. sa send off ceremony sang mga atleta.
Alas-7:00 kaina sang aga, naglupad na padulong sa Paris ang tatlo sini ka mga weighlifters nga sanday Vanessa Sarno, Elreen Ando kag John Ceneza kaupod sang apat ka mga coach.
Sila ang temprano pa nga nagpadulong sa Paris agud maanad sa klima kag ini ang indi makaapekto sa ila performance.
Ang opening sang Paris Olympics ang nakaschedule sa Hulyo 26, samtang ang weighlifting competitions ang patigayunon Agusto 7 tubtob 9.
Suno kay Puentevella, sa 2020 Tokyo Olympics, wala sang financial budget ang gobyerno nga napadala sa mga atleta ilabi na nga pandemic.
Apang matapos nga makadaog sang gold medal, ginalantaw sini nga nakita na sang gobyerno ang ikasarang sang sports gani ini ang ginahatagan naman sang pagtamod kag mas ginpadako man ang reward nga ila mabatun sa pagbalik sa Pilipinas.
Magluwas sa nabatun nga financial budget, ginapahanumdom sini sa mga atleta nga sila ang mangin milyonaryo sa pagpauli sa tion nga makakuha sang bronze, silver ukon gold medal.
Ini ang nagaserbe man nga inspirasyon para sa mga lamharon nga mga atleta sa Palarong Pambansa, nga ang pagdaog sa Olympics, SEA Games ukon Asian Games, ang may monetary benefits nga makapabangon gid sa ila pamilya.
Dako ang pagsalig ni Puentevella sa mga atleta ilabi na nga si Sarno ang World No. 4, si Ceneza ang World No. 5 kag si Ando ang World No. 8.
