Mga dokumento para sa pagtukod sang Asenso Bacolod Transport Cooperative, ginatinguhaan nga mahitso antes ang deadline sang consolidation process bwas Abril 30

Masako sa karun ang technical working committee sang Sentrong Samahan ng mga Tsuper at Operators Negros (SSTONE) kag Federation of Bacolod City Drivers Association (FEBACDA) sa paghingagaw sa mga dokumento sa pagtukod sang “Asenso Bacolod Transport Cooperative”.

Sa interview sang Bombo Radyo Bacolod kay SSTONE Chairman Albert Villanueva, bangod bwas na ang deadline sang consolidation process, ginahingagaw na nila ang pagproseso sang mga dokumento sa Land Transportation Franchising and Regulatory Board (LTFRB) Region 6 agud sila ang mahatagan pa sang provisional authority nga makapadayun sa pagbyahe sang traditional jeepney matapos ang Abril 30.

Paathag ni Villanueva nga ginpili sang SSTONE kag FEBACDA nga maghugpong sa pagtukod sang kaugalingon nga kooperatiba bangod nakita nila nga mabudlay ang management sang mga existing na nga kooperatiba kag korporasyon nga kaangay nga personal lamang nga benepisyo ang ginatulok.

Panindugan sini nga apisar may “Asenso” nga termino sa pangalan sang kooperatiba, ini ang wala ginapanag-iyahan ni Bacolod City Mayor Alfredo “Albee” Benitez.

Suno diri, sila ang natigayon sa pagtukod sang kaugalingon nga kooperatiba sa bulig sang administrasyon.

Aminado ini nga sa karun, ang ila tinutuyo amo nga makapadayun lamang sa pagbyahe kag wala pa nila nadiskusyunan ang pagbakal sang modernized jeepney units.

Suno diri, sila ang nag-apply nga makabyahe sa kabug-usan nga 24 ka mga routa sa ciudad sang Bacolod, kun sa diin sila ang naghamtang sang Area Committee leaders.

Ang requirement lamang agud sila ang mapahanugutan amo nga makabutang sang minimum nga 10 ka units sa tagsa ka routa.

Paathag sini nga ang limit sang units nga ginhatag sa ila nga kooperatiba ang yara sa 1,512, apang sa karun ang ila miyembro ang yara lamang sa 800 tubtob 1,000 nga units.

Aminado ini nga may pila sa mga miyembro nga may problema sa mga dokumento kag duha-duha pa nga makasulod sa listahan.

Sila ang nagpangita man sang temporaryo nga opisina para sa Asenso Bacolod Transport Cooperative, agud may lugar nga madangpan ang mga drivers kag operators.

Pasalig ni Villanueva nga apisar naghugpong ang SSTONE kag FEBACDA, ang tagsa ka federation ang magapadayun gihapon, kag sila ang may mga miyembro man nga wala nagsulod sa consolidation.

Hingyo lamang sini sa mga wala nagpaconsolidate nga respetuhon sila sa pagpadayun sang byahe, bangod parehas man ang ila nga kawsa nga maproteksyonan ang palangabuhian, apang sa lainanay lamang nga pamaagi.