Nagaplano nga magpyansa ang duha ka drayber sang salakyan nga nakabunggo sa nurse nga nagabusong nga resulta sa kamatayon sang mag-iloy sa Purok Proper North, Barangay Taloc, Bago City, Negros Occidental, alas 9:15 sang gab-i sang Domingo.
Madumduman nga nagtabok sa pedestrian lane ang nurse nga si Maria Angela Buendia, 36-anyos, anum ka bulan nga nagabusong kag residente sang nasambit nga lugar sang nabbunggoan ini sang Toyota Avanza Wagon nga ginamaneho ni Philip Jansen Cantiller, 30-anyos, residente sang Deca Homes Subdivision, Barangay Cabug, Bacolod City.
Nagtabog si Buendia sa pihak nga lane kun sa diin nalapakan ini sang Toyota Vios nga ginamaneho ni Salvador Castro, 59-anyos, residente sang Barangay Crossing Pulupandan, Pulupandan.
Bangod sa natabo, naggwa sa tiyan sang iloy ang anum ka bulan sini nga lapsag.
Sa interview sang Bombo Radyo kay Police Lt. Col. Ariel Pico, officer-in-charge sang Bago City Police Station, mapartisipar sa gihapon ang duha sa hearing bisan nga nakapyansa bangod wala man nadula ang kaso nga ginpasaka batok sa ila.
Suno diri, indi man makuha sang duha ang ila salakyan tubtob nga wala sang order halin sa korte.
