Subong nga adlaw sang Domingo de Paskwa ukon Easter Sunday, aton balikan ang mga hitabo sa bilog nga Semana Santa.
Abril 13, Palm Sunday, ginpa-athag sang Parish Priest sa banwa sang EB Magalona, Negros Occidental kun ano ang ginatawag nga Domingo de Ramos ukon Palm Sunday.
Sa interview sang Bombo Radyo Bacolod kay Fr. Ernie Larida, nag-umpisa ang Semana Santa sang nangin madinalag-on ang pagsulod ni Hesus sa Jerusalem kag ang mga tawo nagpreparar sang palma sa pagwelcome sa iya.
Suno diri, madamo sang nakasaksi sa milagro, pagpanabog sang yawa kag pagpaayo ni Hesus sa tawo nga may sakit amo nga ginapaabot na sang tawo ang pag-abot sang manluluwas.
Mensahe ni Larida, dumdumon nga nagkari ang Ginoo sa pagluwas sa tawo gani wala sang rason nga indi magsunod sa iya bangod sa kataposan mismo ang Ginoo ang maluwas sa tawo.
Abril 14, Holy Monday, may tatlo ka ash emission nga nagluntad sa Bulkan Kanlaon.
Sa interview san Bombo Radyo Bacolod kay Ptolomey Mañego, Assistant Science Research Specialist sang PHIVOLCS Kanlaon Volcano Observatory, una nga narecord ang ash emission alas-11:52 sang aga tubtob alas-2:12 sang hapon, kun sa diin nagdangat sa 200 tubtob 800 meters ang kataason sang ginbuga nga abo.
Liwat nga nagbuga sang abo ang Bulkan alas-2:53 sang hapon nga nagdugay tubtob alas-3:34 sang hapon kag ini ang nagdangat sa 600 meters nagikan sa summit crater.
Suno sa PHIVOLCS ang abo ang ginpalid padulog sa west-northwest nga dereksyon.
May nagluntad pa nga ikatatlo nga ash emissions alas-5:17 sang hapon.
Nakaeksperyensya sang light ashfall ang pila ka Barangay sa La Carlota City kag Bago City.
Abril 15, Holy Tuesday, Police Regional Office- Negros Island Region (PRO-NIR) full alert sa Semana Santa tubtob sa eleksyon.
Suno kay PRO-NIR Officer-in-Charge Police Brigadier General Arnold Thomas Ibay, ang skeletal deployment sang kapulisan ang nag-umpisa sang Huwebes samtang full deployment naman sila humalin sang pag-umpisa sang Holy Week tubtob subong nga adlaw.
Abril 16, Holy Wednesday, nag-umpisa ang code red sang Bureau of Fire Protection para sa pag-obserbar sang Semana Santa.
Nagdangat sa 117 ang personnel sang Bacolod Fire Station nga ginloy kag bisan ang mga non-uniformed personnel sang BFP ang gindeploy man.
Samtang, ptay ang babayi nga Brgy Tanod matapos ginluthang samtang nagatakatulog sa ibabaw sang tricycle sa Brooksville 2, Yolanda Housing Project Brgy. Punta Salong, Manapla.
Sa interview sang Bombo Radyo kay Police Major Robelito Mariano, hepe sang Manapla Municipal Police Station, ang biktima ang ginkilala nga si Grace Rabala, 47 anyos, residente sang nasambit nga lugar.// Suno diri, masami nga nagatulog si Rabala sa iya tricycle nga ginapark sa atubang sang iya balay.
Suno sa mga residente, may yara sang nabatian nga mga linupok kag may narekober nga duha ka empty shell sang 9mm pistol.
Abril 17, Maundy Thursday, nagpanwagan ang pari sa ciudad sang Silay nga dapat ikabuhi ang mensahe sang pag-obserbar sang Semana Santa.
Sa interview sang Bombo Radyo Bacolod kay Fr. Agustin “Agot” Hinayan, Resident Priest sa St. John Marie Vianney Shrine, Domus Dei Compound, Silay City, ang pagsaulog sang Semana Santa amo ang pagobserbar sang mga ritual kag mga hilikuton sa pagkomemorar sang mga hinimuan kag natabo kay Jesus nga ginpadala sang Diyos nga amay agud nga magtubos sang mga sala sang katawhan.
Suno kay Fr. Hinayan dapat nga ikabuhi sang mga tumuluo ang mensahe kun ngaa nagpalansang sa krus, napatay kag nabahaw si Ginoong Hesus.
Abril 18, Good Friday, tatlo ang mga napatay sa pag-arado sang pribado nga salakyan nga dala sang Indian national sa mga nagaprusisyon sa Granada-Alangilan Road, Prk. 20, Brgy. Alangilan, Bacolod City, alas-7:20 sang gab-i.
Suno sa Traffic Enforcement Unit sang Bacolod City Police Office, halin sa Barangay Alangilan ang pula nga Toyota Innova kag padulhog na sa Barangay Granada sang nabungguan sini ang tricycle nga nag-overtake sa patrol car sang Bacolod City Police Station 5 nga amo ang nagapanguna sa prusisyon.
Bangud sa kakusog sang impact sang pagbunggo, nagtabog ang tricycle, nagtupa sa ulo sang patrol car kag nagbunggo pa gid sa multi-cab.
Dead on the spot ang driver sang tricycle nga si Jonelo Solan, Sr., 66-anyos, kag residente sang Purok 6, Brgy. Alangilan, Bacolod City.
Pilason man ang lima ka pasahero sang tricycle kag isa sa ila ang ginbawian sang kabuhi sa ospital.
Napilasan man ang lima ka menor de edad nga nagaupod sa prusisyon kag lunsay sila residente sang Brgy. Alangilan.
Nag-agom naman sang minor injuries ang driver sang patrol car sang Police Station 5 nga si PMsg Domingo Villar kag ang kaupod sini nga si PMSg Freddie Jimenez.
Nagpalagyo ang mga nagasakay sa Toyota Innova nga may plate number DBG 6570 apang sila ang nadakpan sang mga pulis, indi man malayo sa ginluntaran sang insidente.
Ang salakyan ang ginamaneho sang Indian national nga si Jagpret Shingh, 37 anyos kag residente sang B133, Lot.89, Buena Park Subd., Brgy. Villamonte, Bacolod City.
Kaupod sini ang mga pasahero nga sanday Hajrgit Singh, Tarenjeet Singh, Satver Singh, kag Balwinder Singh Gill; lunsay Indian nationals kag pumuluyo sang Buena Park Subd., Brgy. Villamonte, Bacolod City.
Abril 19, Holy Saturday, Nagpasiguro ang Bacolod City Police Office nga pasakaan sang kaso ang indina national nga nagamenho sang probado nga salakyan nga nag-ardo sa mga nagaprusisyon.
Sa press conference ni Bacolod City Police Office Director Police Col Joeresty Coronica, ginpaidalom sa alcohol test ang driver kag natumod nga ini ang positibo sa alcohol consumption.
Ginpasiguro man ni Coronica nga indi peke ang drivers license sang suspect apang iba ang tag-iya sang salakyan.
Suno kay Coronica bangud nga nagtuyo nga magpalagyo ang suspek sabaylo nga 18 oras ang reglementary period ini ang ginpasaka sa 36 oras kag ginpasiguro nila nga mapasakaan sang kaso nga “reckless imprudence resulting to multiple homicide”, “multiple physical injuries” kag “damage to property.”
Wala man sang indikasyon nga hungod ang pagbunggo sang mga ini mga deboto nga nagprusisyon sang Biyernes Santo.
