BACOLOD CITY — Nadismaya ang Save Hinobaan Movement matapos nga ginkuga ang babayi nila nga miyembro kasunod sang tuyo kuntani nga magtambong sa public hearing nga ginpatigayon sang banwa sang Hinobaan may kaangtanan sa tukuron nga Southern Negros Industrial Estate and Ship Recycling Facility sang Biyernes, Abril 28.
Ang insidente ang ginpadangat sa Bombo Radyo ni Jimwell Caniedo, lead convenor sang Save Hinobaan Movement, matapos ang public hearing nga ginpatigayon sa gym sang banwa tuhoy sa pasilidad nga patindugon sang Tsuneishi Heavy Industries.
Santo sa iya panaysayon, ginpunggan sila sang mga miyembro sang Guardians nga magsulod sa gym bangud may bitbit sila nga plakards nga nagapautwas sa ila nga pagpamatok sa proyekto.
Nagpamilit sila nga magsulod amo gani nga nagluntad ang komosyon.
Sa tunga-tunga sang gamo suno kay Caniedo, ginkuga ni Alex Macalowa ang kaupod nila nga si Gina Alaton.
Suno diri, wala gid sila nakasulod sa gym bangud mas madamo ang nagabantay nga Guardians kag laban mga babayi ang ila kaupod.
Pamilit sini, dismayado sila sa natabo bangud may pahanugot nagikan kay Mayor Ernesto Estrao nga indi sila pagpahanugutan nga magtambong sa public hearing.
Apang ginpanginwala ni Hinobaan Mayor Ernesto Estrao nga ginkuga sang miyembro sang Guardians ang miyembro sang Save Hinobaan Movement nga si Gina Alaton sang ginpatigayon ang public hearing sa gym sang banwa sang Abril 28.
Sa interview sang Bombo Radyo, ginpahayag ni Estrao nga ang people’s initiative assembly ang ginpangunahan sang Paspas Hinoban-on Association kag indi sang local government unit sang Hinobaan.
Ini ang gin-updan sang 40 ka mga grupo sa ila banwa kag gintambungan sang masobra dos mil ka mga pumuluyo nga nagapabor sa pagpatindog sang Tsuneishi Heavy Industries sang ship recycling facility.
Isa sa mga nagtambong diri ang grupo nga Guardians nga nagserbe manugbantay sa entrance sang gym kag amo ang nag-atubang sa grupo nanday Alaton kag nagluntad ang komosyon.
Gin-usisa sang alkalde kun ano ang ginhalinan sang gamo kag sang ginlantaw ang video, wala man ini sang may nakita nga ginkuga ni Alex Macalowa si Alaton.
Sa baylo, si Alaton pa gani ang nangturisok kag nanindak kay Macalowa nga isa ka job order casual sa munisipyo sang Hinobaan.
Santo sa video, ginpangabay ni Macalowa ang grupo nanday Alaton nga ibilin lang ang plakard agud indi makatuga sang ginamo sa sulod sang gym apang wala ini nagpasugot amo gani nga nagluntad ang komosyon.
