Murder case ni PMaj Etorne nga anay OIC sa Victorias PNP, natumod nga bangod sa napatay nga tatlo ka persona sa checkpoint sa Zamboanga del Norte sang 2016
-- ADVERTISEMENT --

Nakakuha sang dokumento ang Bombo Radyo Bacolod nga ang warrant of arrest nga ginserbe batok sa hepe sang Victorias City Police Station nga si Police Major Ernesto Etorne, Jr. ang bangud sa kaso nga murder nga ginpasaka sang pamilya sang tatlo ka mga lalaki nga ila napatay sa check point sa Liloy, Zamboanga del Norte sang July 29, 2016.

Sa dokumento nga ginhatag sang pamilya ni Angelo Hofer, si Etorne ang pinuno sadto sang 1st Maneuver Company sang Regional Public Safety Battalion 9 sang natabo ang pagpatay kanday Hofer, Anwar Sawadjaan kag Noel Rey Bacalso sa Barangay Overview, Liloy.

Sanday Hofer ang nagasakay sa itom nga pick-up truck kag nagabiyahe sa national road nga nagaangot sang Dipolog City, Zamboanga Del Norte kag Ipil, Zamboanga Sibugay.

Samtang padulong sa Ipil, nakalabay ang mga ini sa rough road gani naghinay ang dalagan sang pick up tubtob nga nakalab-ot sa sementado nga dalan.

Sang yara na sila sa sementado nga dalan, hinali lang nag-ulhot nagikan sa nagapark nga grader ang team ni Etorne kag ila nga gintiro ang pick-up.

-- ADVERTISEMENT --

Nag-isi-isi ang salakyan tubtob nga nakabunggo sa barbed wire nga kudal kag didto na ini nagpundo.

Nagpalapit sanday Etorne agud nga lilion ang mga tawo sa sulod kag sang ila nakita nga buhi pa ang mga ini, sila ang gintiro liwat tubtob nga mapatay.

Sa preliminary investigation sang provincial prosecutor sang Zamboanga del Norte, may yara sang probable cause agud nga pasakaan sang kaso nga murder sanday Etorne, apat ka patrolman kag pila ka John Does sa idalom sang Article 248 sang Revised Penal Code.

Sa warrant of arrest nga gin-issue ni Judge Wendy Josephine Famor sang Regional Trial Court Branch 28 sang Liloy, Zamboanga del Norte sang October 30, 2025 wala sang piyansa nga ginrekomendar para sa temporaryo nga kahilwayan sang lima ka mga pulis.